प्यानल बनाउन तानातान

काठमाडौं,फागुन १५ । सात दिनपछि राजधानीमा सुरु हुने कांग्रेस महाधिवेशनमा पार्टी नेतृत्व लिन सभापतिका आकांक्षी आआफ्ना प्यानल बनाउने कसरतमा जुटेका छन् । कार्यवाहक सभापति रामचन्द्र पौडेल र वरिष्ठ नेता शेरबहादुर देउवा निकटकालाई भागबन्डा मिलाएर उम्मेदवारी घोषणाको तयारीमा छन् ।
सभापति सुशील कोइरालाको निधनपछि संस्थापन पक्षको साझा उम्मेदवार बन्ने कसरतलाई कार्यवाहक सभापति पौडेलले तीव्र बनाएका छन् । तर उनको प्रयास सफल भएको छैन । सभापतिका आकांक्षी महामन्त्रीद्वय प्रकाशमान सिंह र कृष्णप्रसाद सिटौलाका साथै नेतृ सुजाता कोइाला अडानमा कायमै छन् ।

पौडेलले बिहीबार र शुक्रबार पनि सभापतिका आकांक्षीलाई समेटेर साझा उम्मेदवार बन्ने प्रयास जारी राखे पनि सिटौलासहितका नेता सभापतिको उम्मेदवारी घोषणाको अन्तिम तयारीमा जुटेका छन् ।

कार्यवाहक सभापति पौडेलले महामन्त्री सिंहलाई उपसभापति र बिपीपुत्र शसांकलाई महामन्त्रीको प्रत्याशी बनाउने भएका छन् । शुक्रबार बिहान नेता रामशरण महतको निवासमा भएको संस्थापन पक्षको बैठकमा नेता शेखर कोइरालाले शशांकलाई महामन्त्रीको प्र्रत्यासीको रुपमा अघि सार्न सहमत भएका थिए । शेखरले महामन्त्रीको प्रत्याशी बन्नेभन्दा लिगेसी जित्ने कुरा महत्त्वपूर्ण भएको धारणा राखेका थिए । आजको नागरिक दैनिकमा खबर छ ।