कांग्रेस संस्थापनले फागुन १० पछि मात्रै सभापतिको उम्मेदवार घोषणा गर्ने

काठमाडौं, फागुन ६।  कांग्रेस नेतृत्वका लागि वरिष्ठ नेता शेरबहादुर देउवा चुनावी मौनमा भिडिरहेका बेला संस्थापन पक्षले भने सभापतिको उम्मेदवारी अघि सार्नसम्म सकेको छैन । संस्थापन पक्षले नेतृत्वका आकांक्षीबीच सहमति गराउन नसक्दा उम्मेदवार अघि सार्न नसकिएको हो । महाराजगन्जस्थित शशांक कोइराला निवासमा बुधबार बसेको बैठकमा समेत कार्यवाहक सभापति रामचन्द्र पौडेलको नाममा सर्वसम्मत गराउने प्रयास सफल हुन सकेन ।

महामन्त्रीद्वय प्रकाशमान सिंह र कृष्णप्रसाद सिटौलाले आआफ्नो दाबी दाहोर्याएपछि संस्थापन पक्षमा उम्मेदवार तय गर्न ढिलाइ भएको हो । तत्कालीन पार्टी सभापति सुशील कोइरालाको निधन भएको १३ औं दिनसम्म औपारिक सहमति जुटाउने बारम्बारका प्रयास असफल भएपछि संस्थापन पक्षका नेता तथा कार्यकर्तामा निराशा छाएको छ । उनीहरुले औपचारिक तवरमा भए पनि तत्काल सभापतिको उम्मेदवार अघि सार्न नेतृत्वलाई दबाब दिँदै आएका छन् । आजको कान्तिपुर दैनिकमा खबर छ ।